Europako INNOTUB sareak, Interreg POCTEFA programaren laguntzarekin, proiektu berri bat iragarri du datozen hiru urteetarako.
NEIKER, proiektuaren koordinatzailea, ANSES, ENVT, IRTA eta UAB dira Espainia, Frantzia eta Andorraren arteko mugaz gaindiko eskualdean garatuko den proiektuaren bazkideak.
Proiektuak bikaintasuneko sare zientifiko hori sendotzen du, abereetan eta basoko faunan animalien tuberkulosia kontrolatzeko, zaintzeko eta desagerrarazteko programak hobetzeko.
2020an abiatutako hasierako proiektuaren pausoei jarraituz, Espainia-Frantzia-Andorra mugaz gaindiko lankidetzarako Interreg POCTEFA 2021-2027 programak, behin-behienean, datozen hiru urteetarako INNOTUB II proiektua finantzatuko dela iragarri du, eta, horrenbestez, animalien tuberkulosia kontrolatzeko tresna berritzaileak ikertu eta garatzeko ziklo berri bat babestuko dela. Ikerketa ahalegin berri horretan parte hartzen duten bazkideak dira Nekazaritza Ikerketa eta Garapenerako Euskal Erakundea (NEIKER), proiektuaren koordinatzaile gisa, eta Elikaduraren, Ingurumenaren eta Lanaren Osasun Segurtasunerako Agentzia Nazionala (ANSES), Tolosako Albaitaritza Eskola Nazionala (ENVT), Nekazaritzako Elikagaien Ikerketa eta Teknologia Institutua (IRTA) eta Bartzelonako Unibertsitate Autonomoa, aurreikusitako finantzaketa 1,2 milioi eurokoa izanik. Gainera, berrikuntza gisa, INNOTUB II proiektuak Andorrako Gobernuaren parte hartzea du, bazkide moduan, aurreikusitako jarduera batzuk Printzerriko lurraldean ere egingo baitira.
Eskualdean aitzindaria izan zen lehen proiektu baten jarraipen gisa, INNOTUB IIk diziplina anitzeko ikuspegia mantenduko du, eta hainbat gai jorratuko ditu, hala nola ustiategietako biosegurtasun praktiken ebaluazioa, tuberkulosia diagnostikatzeko eta prebenitzeko tresna berrien garapena eta, berrikuntza gisa, etxeko eta basoko animalien arteko gaixotasunaren transmisioa eta tuberkulosia eragiten duten bakterioek antimikrobianoekiko duten erresistentziaren azterketa, sekuentziazio genomikoko teknologia berriak aplikatuz. Gainera, teknologiaren transferentzia eta ezagutzaren trukea bultzatuko dira Frantzia, Espainia eta Andorra hartzen dituen eskualdean.
INNOTUB IIren helburuak
Partzuergoak aurrez garatutako biosegurtasun plataforma bat aplikatzen eta ebaluatzen lan egingo du, abeltzainei abere taldeetan neurri eraginkorragoak ezartzen laguntzeko. Ekimenaren barruan, abeltzainek, albaitariek eta albaitaritza zerbitzuek biosegurtasunari eta horri lotutako arriskuei buruz duten pertzepzioaren ebaluazio zehatza egingo da. Beste helburu garrantzitsu bat izango da tuberkulosiak basoko faunaren eta ganaduaren artean duen transmisioa aztertzea eta interfazean kuantifikatzea, modelizazio metodoak erabiliz eta landan isolatutako bakterioen genoma osoaren sekuentziazioaren bidez lortutako informazioa aplikatuz. Azkenik, aurreko proiektuan tuberkulosiaren diagnostiko molekularra egiteko garatutako metodoak baliozkotuko dira, eta, aldi berean, gaixotasuna hobeto kontrolatzeko diagnostiko tresna eta txerto berriak garatuko dira.
Ikerketaren emaitzek nabarmen lagunduko dute tuberkulosia transmititzeko mekanismoak ulertzen, baita kontrolerako neurri eraginkorrak identifikatzen ere. Ezagutza horrek basoko faunaren zein ganaduaren osasunari mesede egingo dio, eta, aldi berean, pertsonentzako arriskua murriztuko du, eta, horrela, Pirinioez gaindiko eskualdean osasuna eta ongizatea sustatuko ditu.
INNOTUB proiektuak hiru urteko iraupena izango du eta, behin-behinean, INTERREG POCTEFA 2021-2027 Programak finantzatuko du; lurralde lankidetzarako Europako programa bat da hori, eta Espainia, Frantzia eta Andorra arteko muga ingurunearen garapen jasangarria sustatzeko sortu zen. Erkidegoaren laguntza finantzario hori ingurunearen integrazio ekonomikoa eta soziala indartzera zuzentzen da, tokiko biztanleen bizi kalitatea hobetzen laguntzeko. Gainera, programatzen diren proiektuek Eskualdeak Garatzeko Europako Funtsaren (EGEF) finantzaketa ere jasotzen dute.
